Këto pamje rrëqethëse, i përkasin një ferme për mbarështimin e gjedhëve në fshatin Vrinë të Konispolit.
4 fermerë që mbarështojnë prej disa vitesh rreth 200 lopë në fushën e Vrinës po përballen me një ngordhje masive të viçave dhe lopëve. Në më shumë se 1 vit kanë ngordhur 100 krerë.
Sipas tyre arsyeja ende nuk është përcaktuar, por ata dyshojnë se kjo mund të vijë nga mosfunksionimi i hidrovorit të Vivarit për tërheqjen e ujit nga fusha.
Një nga fermerët Asllan Pashaj thotë se ankesat e tyre kanë rënë në vesh të shurdhët, ndërsa autoritetet lokale refuzojnë t’i takojnë.
Ndërkohë kryetari i bashkisë së Konispolit, Shuaip Beqiri, pohon se e njeh situatën e kësaj ferme që sipas tij burimin e ka te kequshqyerja.
Edhe Vasilika Tore, specialiste e mbrojtjes së konsumatorit në bashkinë e Konispolit thotë se shkak për ngordhjen e lopëve është kequshqyerja e tyre./Gsh
