Një i ri nga Berati është dhunuar brutalisht nga tre persona të tjerë dhe pasi shembet në asfalt, askush nuk i jep ndihmë.
Pamjet janë publikuar sot nga “Jeta osh Qef”, ku shihet se si disa të rinj dhunojnë barbarisht një bashkëmoshatarin e tyre.
Ngjarja e rëndë ka ndodhur tre ditë më parë në qytetin e Beratit dhe siç shihet në video, tre djem tërheqin zvarrë viktimën në mes të rrugës dhe e godasin me grushte e shkelma, pa pikë mëshire.
Ndonëse i riu rrëzohet në tokë pranë një makine, një prej djemve vijon ta godasë me grushte e shkelma në kokë e fytyrë, derisa e lë pa ndjenja.
Pamjet janë vërtetë të rënda, ndërsa qytetari tregon se tre djemtë e përfshirë në sherr sot janë në gjendje të lirë.
Asnjë prej kalimtarëve në rrugë nuk ka ndërhyrë për t’i ndarë. Sipas denoncuesit, mendohet se i riu që ra pre e dhunës barbare është kamarier, ndërsa sherri dyshohet se ka ndodhur për motive të dobëta.
“Ky sherr ka ndodhur para 3 ditësh në qytetin e Beratit, ndërsa sot djemtë janë në gjendje te lire. Është diçka shume e tmerrshme. Nuk i njoh personalisht djemtë. Djali qe është goditur është kamarier me aq sa me thanë ndërsa sherri mendohet se ka ndodhur për motive të dobëta”, thuhet në mesazhin e qytetarit që ka dërguar videon.
I riu masakrohet me grushta e shkelma në Berat, askush nuk ndërhyn on Vidnews.
