Ishte i vetmi prind i cili foli për tronditjen dhe pikëllimin që ndiente pas sulmit të së premtes në Munih, ku mbeti i vrarë edhe i biri i tij, Dijamanti 21-vjeçar. Naim Zabërgja, në një intervistë për KTV-në, shpalosi momentet e fundit të jetës së të birit të tij, duke thënë se ai ishte bashkë me një mik, në kohën e sulmit, transmeton Koha.net.
Ai tha se pas ngjarjes tragjike, familjet e viktimave janë të gjitha të bashkuara dhe se janë takuar mes vete, derisa shtoi se numri i njerëzve që kanë ardhur në familje për të shprehur nderime është jashtëzakonisht i madh.
Zabërgja shtoi se familja është kontaktuar si nga autoritetet gjermane, të Bavarisë dhe në nivel shteti, por edhe nga Ambasada e Kosovës.
21-vjeçari ishte një prej nëntë personave që u vranë të premten mbrëma nga sulmuesi, i cili veproi vetëm në qendrën tregtare të parkut Olimpik në Munih. Përpos tij, edhe Armela Segashi 14-vjeçare dhe mikja e saj Sabina Sulaj, kanë vdekur nga sulmi me armë i gjermano-iranianit.
