Java që po mbyllet, ka pasuar ditë të vështira të krijuara nga përmbytjet në disa zonë të vendit, për shkak të reshjeve të dendura të shiut. Kryeministri Rama, i shoqëruar nga ministra të kabinetit qeveritar dhe deputetë socialiste ka vizituar banorët e zonave të përmbytura.
Por rëndësinë kryesore gjatë kësaj jave, e ka zënë çështja e kryeprokurorit të ri, ku nuk ka munguar ftesa e kryeministrit Rama drejtuar kreut të PD-së, Lulzim Basha, për të diskutuar për një zgjidhje.
Kjo çështje ka ngjallur mjaft debate në komisionet parlamentare, mes deputetëve të opozitës dhe mazhorancës. Deputetët e opozitës kanë shprehur vazhdimisht qëndrimet e tyre mbi mënyrën se me sa vota duhet të zgjidhet në Parlament kryeprokurori i ri.
Gjatë kësaj jave, kamerat kanë fokusuar deputetin demokrat Oerd Bylykbashi, duke kërkuar një pozicion të përshtatshëm për të folur për mediat, në mënyrë që të mos kishte diellin përballë.
“Këtu kam diellin kundërshtar”, thotë në një moment deputeti i PD-së, moment i cili është bërë pjesë e rubrikës humoristike në emisionin “Kjo javë” me Nisida Tufën në “News24”.
Pjesë e kësaj rubrike, janë bërë edhe takimet që kryeministri Rama ka zhvilluar këtë të premte në Shkodër, ku mblodhi kabineti qeveritar.
Ajo çka spikati në këto takime, kanë qenë batutat e kryeministrit Rama me kryebashkiaken e Shkodrës, Voltana Ademin.
“Ke ndonjë merak ti”, pyet Rama ministrin Bushati, ndërsa ai i përgjigjet se është “në një linjë me kryetaren”.
“Edhe ti në një me kryetaret je”, i përgjigjet kryeministri.
Sakaq, reagon kryebashkiakja e Shkodrës, Voltana Ademi, e cila i thotë: “Ministri bashkohet me mua për zgjidhjet teknike që ne kemi biseduar”.
Ndërsa kryeministri i është përgjigjur: “Ministri vdiq të bashkohet, por ti s’i afrohesh, se ministri vdiq të bashkohet, edhe unë bashkë me ministrin, por çfarë të bëjmë ne ty”.
Pjesë e kësaj rubrike humoristike, është edhe një takim që kryeministri Rama ka zhvilluar me disa banorë pas situatës së krijuar nga përmbytjet. Gjatë një bisede të shkurtër me dy adoleshentë, Rama ka treguar, se edhe ai kur ishte në atë moshë ka mbajtur vath në vesh.
“Kur kam qenë edhe unë sa ty, mbaja dhe unë vath, më vjen shumë inat që s’e mbaj, dot, po s’më lënë këta”, tha kryeministri, ndërsa nxënësit pasuan në të qeshura./BW
