Armando Broja sot ka mahnitur të gjithë me provën që dhuroi kundër Mançester Junajtid edhe pse nuk ia doli që të shënonte në portën e “djajve të kuq” në rastet që u shfaqën. Sulmuesi shqiptar krijonte panik mes mbrojtësve kundërshtarë sa herë që kishte topin në këmbë dhe ai që e vuajti më shumë ishte padyshim Herri Meguajër.
Mbrojtësi i përfaqësueses angleze, rrallëherë fitoi duel kundër Brojës dhe në fundin e ndeshjes edhe rrezikoi që të shkaktonte një penallti, teksa rrëzoi sulmuesin në zonë. Por për të gjithë tifozët në rrjetet sociale, nuk ishte faulli që u komentua, por momenti kur Broja e dribloi me shumë lehtësi në krah.
Meguajër i ktheu shpinën dhe thjesht nxori këmbën, me Brojën i cili “falënderoi” duke u shkëputur drejt zonës. Një pamje e cila është kthyer shpejt në “meme” nga tifozët e shumtë, të cilët nuk kursyen talljet me mbrojtësin e Anglisë të cilin Broja e turpëroi vazhdimisht me lëvizjet e tij.
PANORAMASPORT.AL
