Rose Bowl, Pasadena. Kujtime të bukur për ish-kapitenin e Brazilit, Carlos Dunga, i cili, më 17 korrik 1994, ngriti Kupën e Botës, fituar me penallti, pas barazimit pa gola me Italinë. 22 vjet më pas, një tjetër barazim pa gola, tani për Dungën trajner, në ndeshjen e parë të Brazilit për Copa America Centenario. Një Brazil i vakët dhe i pafuqishëm përballë Ekuadorit, ndërkohë që Neymar e ndoqi takimin nga tribuna, jashtë kombëtares për shkak se do të luajë në Lojërat Olimpike.
Paraqitje shumë e dobët për sulmin e mesfushën, por edhe për portierin Alisson, i cili fut në portë një top të ardhur nga fundorja. Për fatin e tij të mirë, goli anulohet për shkak se topi kishte dalë jashtë në momentin e krosimit nga Bolanos, por pamjet televizive nuk janë të qarta.
Pjesa më e madhe e topit është jashtë, por nuk ka siguri nëse është i gjithi, çka duhet për ta quajtur të pavlefshëm aksionin.
D.I.
