Pas publikimit të një videoje të opozitës, ku një zyrtar i saj shfaqej në një arë me kanabis për të denoncuar lidhjen e policisë me bandat e drogës, ka reaguar Policia e Shtetit, e cila përmes një komunikate për shtyp ka falenderuar opozitën për jehonën që ajo i bën punës së saj në luftën kundër kultivimit të narkotikëve. Në deklaratë shkruhet se nuk është hera e parë që PD bën politike me rezultatet e policisë, teksa i bën thirrje partisë më të madhe opozitare, që të bashkëpunojë me autoritetet duke denoncuar rastet konkrete që ajo zbulon.
“Policia e Shtetit, në mënyrë të përsëritur, falënderon PD për jehonën që i bën punës së saj. Nuk janë të rralla rastet kur PD ka bërë politikë me punën e policisë, ashtu siç nuk është hera e parë që PD bën politikë me rezultatet dhe sukseset e saj. Policia e Shtetit thekson se lufta kundër kultivimit dhe trafikimit të kanabisit është një luftë e përditshme.
Këtë e dëshmojnë rezultatet e arritura, të cilat nuk kanë asnjë referencë krahasimi me kohën e qeverisjes së PD. Lufta kundër kultivimit të kanabis nuk është e nuk mund të jetë provë e pretendimeve të PD, por vetëm provë e luftës që bën Policia e Shtetit ditë për ditë.
Ftojmë PD të denoncojë raste konkrete pranë autoriteteve të ligjit, e jo të bëjë politikë, aq më pak me vetë punën dhe rezultatet e policisë së shtetit në luftën kundër drogës”, thuhet ne reagimin e policisë./java/a.k
