Policia ka vënë në pranga një 32-vjeçar nga Kamza, i cili akuzohet për kryerjen e një sërë veprash penale. Sipas uniformave blu, gjatë muajit shkurt personi i arrestuar ka djegur një makinë, ka tentuar të djegë një tjetër automjet dhe ka vjedhur një monopatinë.
“Specialistët për Hetimin e Krimeve të Komisariatit të Policisë Nr. 5, si rezultat i veprimeve hetimore të kryera në kuadër të operacionit “Feedback”, për zbardhjen e djegies së një automjeti, kanë identifikuar, kapur dhe vënë në pranga shtetasin: I. Gj., 32 vjeç, banues në Paskuqan”, njofton policia.
32-vjeçari është person me precedent të theksuar kriminal në fushën e vjedhjes dhe fushën e narkotikëve.
Nga veprimet hetimore të kryera në kuadër të operacionit dyshohet se ky shtetas:
-më datë 09.02.2025, në Babrru, ka djegur automjetin e shtetasit A. M.;
-më datë 04.02.2025, në Babrru, ka tentuar të djegë automjetin e shtetasit A. H;
-më datë 02.02.2025, në Kamëz, ka vjedhur një monopatinë.
Gjatë kontrollit, policia ka sekuestruar 2 maska, 2 jelekë multifunksionalë si ato të policisë dhe 1 shkop bejsbolli, që grabitësi i mbante në banesë.
