Koalicioni i Vëzhguesve Vendorë, në një konferencë për shtyp rreth orës 09:50, informoi mbi ecurinë e procesit zgjedhor, si dhe problematikat që kanë shoqëruar hapjen e qendrave të votimit.
Vëzhguesit vendorë theksojnë se po monitorojnë procesin zgjedhor në të gjitha komisionet zonale të administrimit zgjedhor. “Ka qenë një natë e ngarkuar për të gjithë operatorët zgjedhorë, veçanërisht për KQZ-në deri rreth orës 1:00 të mëngjesit, veçanërisht lidhur me komisionin zonal të administrimit zgjedhor të komunës Kurbin. Ka pasur një problematikë por është emëruar një anëtar nga radhët e shoqërisë civile dhe është duke funksionuar tashmë me 4 anëtarë. Ndërkohë që ka pasur edhe probleme të tjera lidhur me ndërrime të komisionerëve dhe disa vendimmarrje, sidomos me qendrat e votimit të posaçme, që janë ngritur pranë burgjeve dhe për të cilat ka një bazë materiale të munguar sidomos fletëvotimi”, thekson Koalicioni i Vëzhguesve Vendorë.
Gjithashtu, komisioni vëren se shikohet që ka një ngarkesë në orët e para të mëngesit, por vlerësohet se situata do të stabilizohet shumë shpejt.
Në këtë drejtim, Koalicioni i drejton një apel forcave politike që të marrin përgjegjësinë e duhur për të respektuar Kodin Zgjedhor në lidhje me prezencën e komisionerëve.
“Është shumë e rëndësishme që në këtë ditë të votimit, ata të jenë të qetë dhe të jenë të distancuar nga të gjitha ngjarjet jo të hijshme, për të lehtësuar pjesën e lejimit të qytetarëve për të votuar në këtë ditë të qetë edhe festive. I bëjmë gjithashtu apel të drejtpërdrejtë dhe qytetarëve që të votojnë”, thuhet në deklaratën e Komisionit të Vëzhguesve Vendorë.
