Partia Demokratike del me deklaratë lidhur me seancën e sotme parlamentare, duke thënë se Partia Socialiste miraton me një vit vonesë amendamentet e opozitës për të mos iu shkurtuar fondet organeve të vettingut.
Në qëndrimin e PD thuhet se Partia Socialiste refuzoi një vit më parë amendamentet e opozitës për të miratuar pa asnjë shkurtim kërkesën e organeve të vettingut për burime njerëzore.
“Ishte vendim i Edi Ramës që të shkurtonte me 40% numrin e këshilltarëve dhe stafit ndihmës të organeve të vettingut. Sot, një vit më vonë Edi Rama u kthye tek amendamentet e opozitës. Për të mbuluar faktin se u bë pengesë qëllimisht për funksionimin e shpejtë të organeve të vetingut, nxiti Taulant Ballën të shpifë kundër opozitës”, thuhet në deklaratë.
Më tej shtohet se Qeveria e Edi Ramës nuk mund të mbulojë lidhjet me krimin e organizuar me përbetimet e dashurisë ndaj reformës në drejtësi, ku nënvizon se zbatimin e të cilës po e vonon prej 2 vjetësh.
Po ashtu PD thotë se opozita nuk ka kërkuar dhe nuk do të kërkojë kurrë pazar me Edi Ramën.
Në mbyllje të qëndrimit nënvizon se “7 pikat e platformës së opozitës kishin për qëllim vetëm zbatimin e Kushtetutës. Edi Rama nuk e do këtë, sepse është përkrah bandave dhe është armiku kryesor i shtetit ligjor”.
/b.d
