Ish kryetari i komisionit të posaçëm parlamentar për reformën në drejtësi, ka përshëndetur nisjen e vettingut në radhët e Policisë së Shtetit.
Përmes një postimi në rrjetin social Twitter, Xhafaj ka treguar edhe disa nga detajet e kësaj reforme e cila u projektua dhe nisi të implementohet gjatë kohës kur ai ushtronte funksionin e ministrit të Brendshëm.
“Një lajm i mirë. Nisi dje seanca e parë e vettingut për punonjësit e Policisë së Shtetit, Gardës së Republikës dhe SHÇBA. Vettingu një standard ndërkombëtar, jetik për krijimin e një trupe policore profesioniste dhe me integritet të lartë moral dhe profesional. U punua fort për muaj të tërë gjatë 2017, për konceptimin e kësaj reforme”, nënvizon Xhafaj.
Më tej, deputeti socialist shpjegon edhe shtyrjen e zbatimit të procesit të vettingut në polici, duke theksuar se së bashku me reformën në drejtësi, do të sjellë shpresë për ringritjen e institucioneve në standard ndërkombëtare.
“U zvarrit pa asnjë shkak, për arsye krejt subjektive, por më mirë vonë se kurrë! Shpresoj që gjithçka të eci mbarë përmes një procesi objektiv, të paanshëm dhe profesional jashtë çdo ndikimi politik dhe shtetëror. Asistenca e mbikëqyrja ndërkombëtare, por edhe transparenca e medias së lirë, një garanci e madhe. Vettingu në Polici së bashku me zbatimin e Reformës në Drejtësi shpresë dhe besim në ringritjen e institucioneve në standardet europiane si parakusht për luftën reale kundër korrupsionit e krimit të organizuar dhe konsolidimin e shtetit të së drejtë”, përfundon Xhafaj.
g.kosovari
