Qepa dhe hudhra, gjithmonë kanë qenë përbërës të thjeshtë në kuzhinë, por që i bëjnë shumë mirë shëndetit tonë.
Shkenca, vitet e fundit, ka vendosur të hulumtojë rreth vetive të qepës dhe ushqimeve të tjera, që janë pjesë e familjes së saj, siç është hudhra. Tani studiuesit kanë vendosur në relacion konsumimin e qepës dhe hudhrës me veprimin e tyre mbrojtës në stomak, duke iu referuar sëmundjeve të rënda, siç është kanceri.
Studimi është kryer nga Universiteti i Milanos dhe nga Instituti Farmakologjik “Mario Negri”. Ky studim është publikuar në revistën shkencore “Molecular Nutrition & Food Research”.
Objektivi i këtij studimi ka qenë sigurimi i të dhënave të reja epidemologjike dhe mbledhja e provave në shoqata të ndryshme për konsumimin e qepës e të hudhrës dhe rrezikut të kancerit në stomak.
Studiuesit arritën në përfundim se konsumimi i lartë i ushqimeve të varieteteve Allium, të tilla si qepa dhe hudhra, mund të zvogëlojë rrezikun e kancerit në stomak.
Studiuesit krahasuan zakonet e të ushqyerit të 230 njerëzve, të cilët kanë qenë të diagnostikuar me kancer në stomak, me zakonet e të ushqyerit të 547 njerëzve të shëndetshëm. Ata vunë re se konsumimi i të paktën 2 porcioneve të qepës në javë, rreth 50 gram secila, kishte një rrezik më të ulët, me 40%, për t’u sëmurur nga kanceri i stomakut, në krahasim me ata që nuk e konsumojnë qepën.
Sëbashku me qepën, edhe konsumimi i hudhrës ka dhënë rezultate të dobishme. Zakoni i të ngrënit hudhër çdo ditë është shoqëruar me një reduktim prej më shumë se 30% të rrezikut të kancerit gastrik.
Pra, qepa dhe hudhra dhe në përgjithësi ushqimet që përmbajnë komponime të squfurit, janë të dobishme për parandalimin e kancerit, por edhe për ngadalësimin e një bakteri që shkakton ulçerën dhe gastritin, që është Helicobacter pylori. Studimet e mëparshme kanë treguar se hudhra është një ushqim mbrojtës përsa i përket rrezikut të kancerit të zorrës së trashë./Shije
