Kryetari i Partisë Demokratike, Lulzim Basha, priti sot në një takim zv.ndihmës Sekretaren e Shtetit, Elisabeth Millard, të cilën e njohu me situatën në vend si dhe me procesin e vetingut në politikë.
Në njoftimin e shpërndarë nga zyra e shtypit të PD, gjatë takimit kryedemokrati Basha ka theksuar se ky është një proces pastrimi, që nuk pengon hetimet e drejtësisë për politikanët dhe zyrtarët e lartë.
“Në një vend ku krimi dikton vendimmarrjen nuk mund të flitet për institucione të pavarura dhe standarde demokratike”, – theksoi Basha.
Kreu i opozitës shprehu vendosmërinë për t’i shkuar deri në fund pastrimit të politikës nga krimi, duke kërkuar ndihmën dhe mbështetjen edhe të SHBA në këtë proces jetik për vendin dhe të ardhmen e tij.
Kryetari i Partisë Demokratike shprehu mirënjohjen e tij për kontributin e jashtëzakonshëm të SHBA, për paqen dhe stabilitetin në rajonin e Ballkanit dhe ndau me zyrtaren e lartë amerikane, vlerësimin e tij se roli dhe vëmendja e SHBA ndaj zhvillimeve në rajon është e një rëndësie përcaktuese për të ardhmen euro-atlantike dhe europiane të Ballkanit Perëndimor. /b.d
