Lëvizja Vetëvendosje përkundër se në disa reagime publike u ankuan se zyrtarët policorë përdorën dhunë në arrestimin e Albin Kurtit dhe aktivistëve të tjerë, ata ende nuk kanë bërë një ankesë të tillë, zyrtare, në Inspektoratin Policor. Njësoj siç asnjë protestues tjetër nuk është ankuar ende në IPK për forcën e përdorur nga Policia në protestën e 28 Nëntorit. Kështu pohon vetë institucioni që mbikëqyrë Policinë e Kosovës.
Manifestimi paqësor i opozitës, në Ditën e Flamurit, rezultoi në arrestimin e ish-liderit të LVV, Albin Kurtin dhe 97 aktivistëve të tjerë të njëjtës lëvizje. Vetëvendosja në deklarata të ndryshme publike u ankuan se policia përdori dhunë ndaj tyre kur arrestoi aktivistë dhe në bastisjen e selisë. Por, ata nuk janë ankuar ende në Inspektoratin Policor të Kosovës për përdorim të forcës nga Policia.
