Vetëvendosje i ka dhënë përkrahje protestës së shqiptarëve në Shkup, ndërkohë që nuk i ka dhënë përkrahje protestës së AAK-së dhe NISMA-s që pritet të mbahet edhe një javë.
Lëvizja Vetëvendosje ka shkruar në faqen zyrtare në Facebook se përkrah protestën e parashikuar të mbahet më 9 maj nga Këshilli Opozitar në Shkup.
“Lëvizja VETËVENDOSJE! përshëndet protestën që do të mbahet të hënën më 9 maj në Shkup. Kjo protestë është shprehje e përbashkët e organizimeve të ndryshme qytetare shqiptare në Maqedoni, dhe adreson problematikat shqetësuese që ka krijuar pabarazia etnike të cilën tash e shumë vjet e përjetojnë shqiptarët në Maqedoni.
Është për t’u vlerësuar fakti se kjo protestë po mbështetet nga të gjitha subjektet opozitare shqiptare, si dhe nga grupe të ndryshme të interesit qytetar e shoqëror të shqiptarëve në Maqedoni, të cilat më në fund kanë gjetur fjalën e përbashkët për t’u organizuar”, janë shprehur mes të tjerash ata. (B.an)
