“Beqaria” e Dusan Vlahovic nuk zgjati shumë. Sulmuesi i Juventusit, sipas “Novella 2000”, është lidhur me modelen 23-vjeçare, Carolina Stramare.
Vetëm një javë më parë, influencuesja me 1.5 milion ndjekës në Instagram, Maria Sole Pollio, zbuloi fundin e lidhjes së saj me gjigantin serb. “Dusan ka vendosur të fokusohet te futbolli dhe në ekipin e ri”, – raportonte revista “Chi”.
Megjithatë, duket se talenti i Juventusit nuk iu ka rezistuar dot syve blu dhe fizikut si statujë të modeles, “Miss Italia 2019”. Të dy mësohet se ishin takuar në Firence disa kohë më parë. Pas transferimit në Torino të sulmuesit të datëlindjes 2000, mësohet se ato kanë kaluar edhe ditëlindjet e tyre përkatëse së bashku.
Serbi mbushi 22 vjeç më 28 janar, ndërsa ajo kishte fikur 23 qirinj një ditë më parë. Mes dhuratave të marra nga modelja, e quajtur nga fansat si “Megan Fox italiane”, është edhe një SUV krejt i ri. Dërguesi bujar mbetet ende i panjohur.
Carolina Stramare është gjithashtu një tifoze e madhe e Juventusit. Një tjetër argument në favor të flirtit, ende i pa konfirmuar zyrtarisht nga personat e përfshirë drejtpërdrejt, të cilët për momentin nuk e ndjekin as njëri-tjetrin në Instagram.
