Të paktën 16 punonjës të qeverisë amerikane kanë vuajtur simptomat e një sulmi të mundshëm akustik që ka pasur në shënjestër ambasadën amerikane në Kubë.
Sipas Departmentit të Shtetit, disa pjesëtarë të stafit diplomatik patën nevojë për trajtim mjekësor pas sulmit që tashmë duket se ka pushuar. Kuba ka mohuar përfshirjen në një ngjarje të tillë dhe është shprehur se po heton pretendimet.
Agjencia e Lajmeve Associated Pres raportoi se humbja e dëgjimit të diplomatëve ka qenë lidhur me disa pajisje zanore të cilat lëshonin tinguj të pakapshëm nga veshi i njeriut, por që mund të shkaktonin shurdhimin. Sipas zëdhënëses së Departamentit të Shtetit, situata po konsiderohet shumë seriozisht nga autoritetet amerikane.
Stafi i ambasadës amerikane dhe të paktën një pjesëtar i stafit të ambasadës kanadeze filluan të vënë re simptomat e tyre në fund të vitit të shkuar. Viktimat, disa prej të cilëve janë tërhequr nga Kuba, u trajtuan në SHBA, por edhe nga doktorët në Kubë.
Sekretari amerikani i Shtetit Reks Tillerson e ka konsideruar incidentin si një sulm ndaj shëndetit. Ajo çka vlen për t’u theksuar është se incidentet kishin vijuar edhe pasi stafi amerikan u ankua dhe pasi autoritetet kubaneze thanë se po hetonin shkakun. Ndërkohë, po ndërmerren hetime të vecanta nga amerikanët, kanadezët dhe kubanezët, ndërsa janë rritur masat e sigurisë në rezidencat e diplomatëve në Havana.
Analistët e sigurisë besojnë se një vend i tretë që ka marrëdhënie armiqësore me SHBA-të mund të jetë përfshirë në këtë ngjarje, megjithatë asgjë nuk është e qartë akoma, përgatiti Koha. (b.an)
