Komisioneri Shtetëror i Zgjedhjeve, Ilirjan Celibashi shqyrtoi sot raportin mbi veprimtaritë publike për periudhën 02 shkurt – 08 shkurt 2025.
Në këtë mbledhje u miratua raporti i gjetjeve dhe filloi procedimi administrativ ndaj Drejtorisë Vendore të Policisë Lezhë dhe ndaj Prefektit të Qarkut Shkodër.
U shqyrtua administrativisht denoncimi me nr. 3, datë 03.02.2025, të Organizatës Qendra “Qëndresa Qytetare”. Komisioneri vendosi të shtyjë shpalljen e vendimit.
Gjithashtu, u shqyrtua administrativisht denoncimi nr. 4, datë 06.02.2025 të Koalicionit “Për Reforma, Integrim dhe Institucione të Konsoliduara”. KSHZ vendosi pushimin e hetimit administrativ të denoncimit nr. 4, për sa i përket ligjit “Për një shtesë në ligjin 29/2023 “Për tatimin mbi të ardhurat” pasi ligji është miratuar në Kuvend dhe pret dekretimin e Presidentit të Republikës.
Komisioneri Shtetëror i Zgjedhjeve konstaton se, miratimi i dy projektligjeve, “Për disa shtesa dhe ndryshime në ligjin nr. 92, datë 24.07.2014, ‘Për tatimin mbi vlerën e shtuar në Republikën e Shqipërisë’” dhe projektligjit “Për paketën e maleve”, nuk respekton kërkesat e nenit 91, pika 4 të Kodit Zgjedhor.
Ky vendim bazohet në parimin e neutralitetit të institucioneve shtetërore gjatë periudhave zgjedhore, duke synuar shmangien e çdo ndikimi të mundshëm mbi elektoratin përmes ndryshimeve në politikat fiskale apo ekonomike. Në këtë kontekst, miratimi i këtyre projektligjeve, të cilat prekin politika të rëndësishme fiskale, mund të krijojë perceptimin e përdorimit të mjeteve ligjore për qëllime elektorale.
Për këtë arsye, Komisioneri i kërkon Kuvendit të Shqipërisë të mos i shqyrtojë këto dy projektligje në seancë plenare.
Sot u vlerësuan raportet e monitoruesve të fushatës zgjedhore për periudhën e monitorimit 2 deri më 9 shkurt 2025. Procesi i monitorimit ka nisur në datën 11 janar dhe deri më sot, nga ana e monitoruesve janë prodhuar tre raporte monitorimi, të cilat janë të publikuara në faqen zyrtare të KQZ. Për periudhën 2 deri në 9 shkurt janë përcjellë në total 96 raporte monitorimi pranë Komisionit Qendror të Zgjedhjeve. Nga administrimi dhe shqyrtimi i këtyre raporteve të monitorimit për periudhën kohore të lartpërmendur, nuk është konstatuar ndonjë shkelje që bie ndesh me parashikimet ligjore.
U plotësua gjithashtu edhe vakanca në Këshillin e Bashkisë Gjirokastër, me kandidatin nga lista shumemërore e subjektit zgjedhor “Partia Socialiste e Shqipërisë”, Ana Papadhimitri.
