Nga Ben Andoni
Opozita shqiptare, e kryesuar nga Partia Demokratike ka vepruar ashtu si ishte parashikuar, që prej ditësh. Ka përfunduar përgatitjet e ethshme për protestë sak në fundjavë. E ka realizuar atë, me skenografinë e vet. Pastaj ka ngritur çadrën mu përballë kryeministrisë. Një gjë të tillë e ka bërë kohë më parë kryeministri aktual Rama. Kryetari Basha nuk lë risi të Ramës pa e realizuar.
Të dy shumë refuzues me gazetarët dhe shpesh duke i ngacmuar, tashmë i janë futur rrjeteve sociale. Por, kuptohet ka qenë Rama, ai që e ka bërë i pari kontaktin dhe madje ka sajuar edhe diskutimin e lodhshëm virtual të ditës së dielë. Rrjeteve sociale i është drejtuar tashmë edhe kryeministri në hije Basha.
Kohë më parë, Edi Rama kuptoi se nuk mund ta shtynte përpara ngrehinën e kalbur të partisë së tij me të vjetrit dogmatikë të Partisë Socialiste. Ndaj ju drejtua të rinjve. Një gjë të tillë po bën tashmë edhe Lulëzim Basha. Ai në fjalën e tij patetike të ditës së shtunë u ka kërkuar atyre të marrin përgjegjësi dhe u është bindur, ndaj edhe verdiktin e vazhdimit të grevës ua ka lënë pikërisht të rinjve. Dhe, ata, që e kishin përgatitur me kohë, ikën morën çadrat, që të mos i lënë asgjë mangut Ramës. Lista është e gjatë e imitimeve, por të duhet edhe pak kujtesë kulisash, ku të dy duket se ndjekin njëri-tjetrin qoftë edhe me hapat blof që bëjnë.
Ndërkohë aty jashtë kryeministrisë do fillojnë një grevë të rinj, qytetarë të ndryshëm dhe militantët medoemos. Si dy pika uji, me atë që ka ndodhur dhe çfarë do të ndodhë më pas, duke e kthyer Shqipërinë në një deja vu të stërmadhe.
Në këtë orë askush nuk e parashikon sesa do të zgjasë greva, por një gjë dihet fare mirë se pushteti do të mbyllë veshët dhe do të vazhdojë punë. Grevistët do të dalin, kur të futen me patjetër në lojë ndërkombëtarët, sepse në vend askush nuk do të dëgjojë, kurse Tirana do të vuajë si gjithnjë kapriçot e politikës dhe patetizmin e militantëve.
Nga ana tjetër, politika shqiptare, e dy krahëve, do tregojë se nuk mund të bëjë përpara, kurse rekomandimet dhe shpresa për hapjen e vizave do të marrë goditjen e radhës.
Shqipëria për fatin e keq e ka të shënjuar rrugën e saj, që do të thotë një hap para dhe dy pas, sepse kështu duan njerëzit që janë mësuar me pushtet (lexo elitat tona). Pushteti është gjithçka, porse ai shfrytëzon masat, që të kapluar në varfëri dhe humbje shpresë gjejnë mundësi të shfrehen, sipas oreksit dhe dirigjimit të shëmtuar politik. Kurse në këtë rast Basha duke i bërë qindin armikut të tij të betuar kryeministrit të vendit, duke e imituar dhe duke e sulmuar pikërisht me armën e tij, bëhet ende më cinik me vendin e tij.
Por forma sado që është cilësi e vyer, asnjëherë nuk e zëvendëson përmbajtjen dhe sa i përket asaj Basha nuk duhet ta imitojë Ramën sepse thellësia dhe sinqeriteti i përballjes me problematikën e vendit është ajo që politikanët shqiptarë i kanë vendosur kaherë barrierë. Mu atë që nuk na le ta shohim bregun e mezipritur të ankorimit në Bashkimin Evropian, ndaj është i shëmtuar imitimi i fundit i Ramës. (Javanews)
