Organizata e Kombeve të Bashkuara për Edukim, Shkencë dhe Kulturë, UNESCO, të dielën, i ka futur veprat e arkitektit francezo-zviceran Le Corbusier në listën e vet të lokaliteteve të trashëgimisë botërore – përfshirë edhe qytetin indian Chandigarh, të cilin ai e kishte planifikuar më 1950, transmeton KD shkrimin e AFP.
Vendimi është bërë publik, pasi që Komiteti i Trashëgimisë Botërore rifilloi të dielën, pas suspendimit të një ditë më parë, për shkak të përpjekjes së dështuar për puç në Turqi, që mori jetën e më shumë se 260 njerëzve.
Krijimet e përzgjedhura të Le Corbusierit, pasqyrojnë kontributet e tij për Lëvizjen Moderne që doli pas Luftës së Parë Botërore me një theks mbi funksionalitetin, linjat e guximshme dhe materialeve siç janë betoni, hekuri e qelqi.
Komiteti ka përfshirë 17 lokalitete në shtatë shtete – përfshirë Francën, Zvicrën, Belgjikën, Gjermaninë, Argjentinën, Japoninë dhe Indinë – për të treguar arritjet globale të punës së Charles-Edouard Jeanneret-Gris, që më mirë njihet si Le Corbusier.
Qysh prej planifikimit mjeshtëror modernist që i kishte bërë Chandigarhit në veri të Indisë, e deri në Paris, që ai ëndërronte ta realizonte si qytet më racional, Le Corbusier asnjëherë nuk kishte frikë që të mendonte projekte të mëdha.
Ai ka lënë gjurmët më të mëdha në Francë, ku ndodhen jo më pak se 10 nga gjithsej 17 projekte që ka klasifikuar UNESCO për t’i mbrojtur si lokalitete të trashëgimisë botërore.
Mes tyre është edhe kryevepra “La Cite Radieuse” që ndodhet në Marseille, po ashtu edhe Manastiri Dominikan “La Tourette” në afërsi të Lyonit dhe “La Villa Savoye” që ndodhet në afërsi të Parisit, përgatiti Express. (b.an)
