Kolegji i Posaçëm i Apelimit shtyu për më 12 shkurt seancën për gjyqtarin e Gjykatës së Lartë, Edmond Islamaj, rikonfimimi i të cilit në detyrë pas skanimit të Vetingut, u ankimua nga Komisioneri Publik. Kështu, gjyqtari Islamaj paraqiti në seancën e sotme prova të reja për rivlerësimin e pasurisë.
Gjyqtari Islamaj, paraqiti informacion të detajuar për hyrje-daljet e tij nga territori i Shqipërisë dhe personave të lidhur me të, për periudhën 1 janar 2004 deri në 1 janar 2008.
Po ashtu ai i kërkoi trupit gjykues të marrë në cilësinë e provës tri dokumente shkresore të lëshuara nga autoritetet shtetërore me kërkesë të tij.
Kërkesa e gjyqtarin e Gjykatës së Lartë, Edmond Islamaj u pranua dhe trupi gjykues i KPA-së, vendosi të marrë në cilësinë e provës aktet shkresore të paraqitura nga subjekti i rivlerësimit, prova për të cilat Komisioneri Publik deklaroi se do të shprehet në konkluzionet përfundimtare.
Po ashtu, për t’i mundësuar Njësisë së Shërbimit Ligjor të analizojë provat e reja dhe të bëjë një rivlerësim të situatës financiare, trupi gjykues vendosi të shtyjë seancën gjyqësore ditën e martë, më datë 12 shkurt. /a.rada
