Qeveria e Kosovës ka marrë vendim që nga sot të vendoset reciprocitetit ndaj Serbisë sa i përket targave të automjeteve. Lajmi është bërë me dije nga ministri i Brendshëm, Xhelal Svelça, i cili shpjegon se nga sot të gjitha automjetet serbe që hyjnë në territorin e Kosovës të pajisen me targa të përkohshme.
“Ministria e Punëve të Brendshme, së bashku me Policinë e Kosovës, në kuadër të aktiviteteve të zakonshme si dhe me qëllim të ruajtjes së rendit publik dhe kushtetues, është duke kryer veprime në të gjithat pikat kufitare. Veprimet kanë për qëllim zbatimin e marrëveshjes për lëvizjen e lirë- konkretisht targave të automjeteve”, sqaron ministri.
Lidhur me këtë vendim njoftohet se janë marrë të gjitha masat e domosdoshme për të reduktuar në maksimum pritjet në pikat kufitare.
Bëhet me dije se nga data “15 shtator nuk ka në qarkullim asnjë veturë të pajisur me targa valide “KS” dhe rrjedhimisht targat e vetme ligjore dhe me afat të lëshuara nga zyrtarët e Ministrisë së Punëve të Brendshme janë ato me denominimin “RKS””.
Ky vendim është marrë në kuadër të vendosjes së reciprocitetit me Serbinë, pasi një masë e tillë është në fuqi në Serbi prej kohësh.
/a.r
