Në fund të muajit tetor, qytetarët e Tiranës që nuk janë të pajisura me certifikatë të pronësisë për shkak të problemeve të ndërtuesve duhet të bëjnë një kërkesë pranë njësive administrative ku jetojnë.
Kjo, pasi bashkia e kryeqytetit me vendimin e miratuar në këshillin bashkiak do të hipotekojë 1375 objekte, kryesisht pallate. Por cilat janë kategoritë që do të kenë prioritet në këtë proces?
“Të gjitha ato pallate që kanë shkelje të lejes së ndërtimit, por jo shtesa në volumet e tyre. Objekt i këtij vendimi: Të gjitha ato objekte ndërtimi jashtë kushteve të lejes, që janë kryer nga subjekte ndërtues që ose kanë falimentuar ose janë në kushte falimentimi, ose janë inaktiv. Inaktiv do të thotë se nuk kanë asnjë lloj interesi për të përfunduar procedurën e regjistrimit të objektit në Hipotekë.”, tha Klotilda Ferhati, kryetarja e këshilltarëve socialistë raporton Expres. Ajo shtoi se tha se kostoja për këtë proces do të përballohet nga bashkia e Tiranës përmes një fondi të posaçëm nga buxheti vjetor.
“Nuk i rëndojnë xhepat e qytetarëve. Do të ketë vetëm një tarifë shërbimi, siç llogariten nga kostot. Ka një bazë ligjore në Shqipëri që përllogarit koston për shërbim nga shërbimet e drejtorive të Urbanistikës. Lëshohet një leje e re për atë ndërtim të kryer pa leje. Pasi të jepet kjo leje e rishikuar do të fillojë procedura për dhënien e lejes. Qytetarët kanë të drejtën të paraqiten në Hipotekë, dhe të regjistrojnë shtëpitë që kanë blerë ose dyqanet dhe të tërheqin titujt e pronësisë.”, u shpreh ajo.
Në njësitë vendore do të ketë punonjës që do të presin aplikimet, por bashkia i kërkon qytetarëve që të mos nxitohen për të krijuar flusk pasi kanë një vit afat për të bërë kërkesë për hipotkimin e apartamentit të tyre./a.m.
