Pas Suedisë edhe Finlanda ka paralajmëruar se do të dëbojë afro 20 mijë migrantë, nga 32 mijë sa kanë kërkuar azil atje, vitin e kaluar. Sekretarja e Ministrisë së Brendshme, Paivi Nerg, ka thënë se vendi i saj pritet të refuzojë gati dy të tretat e kërkesave për azil, të bëra në vitin 2015.
Vitin e kaluar, Finlanda i ka forcuar kushtet për azil për migrantët që vijnë nga Iraku, Afganistani dhe Somalia, duke thënë se situata e sigurisë në këto vende është zbutur, përcjell Albinfo.
Nerg ka thënë se dy fluturime çarter për dëbimin e irakianëve do të realizohen brenda muajsh.
Ajo ka thënë se dëbimet do të bëhen gradualisht, në përputhje me përpunimin e aplikacioneve nga autoritetet e migracionit. Autoritetet finlandeze, aktualisht, janë duke negociuar me Rusinë fqinje për të ndaluar hyrjen e migrantëve në Finlandë përmes rajonit të Arktikut.
Suedia ka paralajmëruar se mund të dëbojë deri në 80 mijë azilkërkues.
