Ministrat teknikë të emëruar nga Partia Demokratike kanë vazhduar të qëndrojnë në detyrë, edhe pse nuk kanë firmosur vendime me karakter financiar. Ministrja e Financave, Helga Vukaj, ka deleguar kompetencat e saj te zëvendësministrat e Financave, Erjon Luçi dhe Irena Beqiraj për 14 vendime që kanë hyrë në fuqi më datë 1 gusht.
Këto vendime të botuara në Fletoren Zyrtare kanë të bëjnë me pensionet suplementare, mbledhjen e rentës minerare apo kërkesat për rialokim fondesh.
Në Fletoren Zyrtare të datës 1 gusht bien në sy vendimet e ministres së Financave, e cila në 13 vendime ia delegon kompetencat e saj për të firmosur vendimet zv.ministrit Erjon Luçi dhe vetëm në një rast ia delegon zëvendëses tjetër, Irena Beqiraj.
Vendimet e Vukajt për të deleguar kompetencat janë marrë edhe para datës së zgjedhjeve, pra në qershor, edhe pas saj për gjatë gjithë korrikut.
Burime bënë të ditur se ministrat e PD-së qëndrojnë në detyrë, por nuk firmosin vendimet e qeverisë për të mos mbajtur përgjegjësi kur të mos ushtrojnë më këto funksione.
TENDERËT
Por, përpos ministres së Financave, edhe ministrja tjetër teknike e Partisë Demokratike, Xhuljeta Kërtusha, e cila drejton Ministrinë e Mirëqenies Sociale, ka firmosur më 7 korrik delegimin e kompetencave.
“Delegimin e kompetencave të titullarit të Autoritetit Kontraktor për Ministrinë e Mirëqenies Sociale dhe Rinisë, z. Elird Qëndro, me detyrë drejtor i përgjithshëm, Drejtoria e Përgjithshme e Shërbimeve Mbështetëse për Prokurimet e Fondeve Publike”, thuhet në vendimin e firmosur nga ministrja Kërtusha.
Vetë Kryeministri Rama kishte deklaruar se ministrat teknikë do të largohen nga qeveria fill pas zgjedhjeve të 25 qershorit. Por edhe sot e kësaj dite ata vazhdojnë të qëndrojnë në detyrë. Delegimi i kompetencave në të gjitha rastet është bërë bazuar në Kushtetutën e Shqipërisë dhe vendimit të Kodit të Procedurave Administrative.
“Në mbështetje të nenit 102, pika 4 të Kushtetutës të Republikës së Shqipërisë, të neneve 28, 29 të ligjit nr. 44/2015, datë 30.4.2015, ‘Kodi i Procedurave Administrative të Republikës së Shqipërisë’, të nenit 6, të ligjit nr. 9000, datë 30.12.2003, ‘Për organizimin dhe funksionimin e Këshillit të Ministrave’ dhe të nenit 11, të ligjit nr. 90/2012 ‘Për organizimin dhe funksionimin e administratës shtetërore’”, thuhet në argumentin ligjor të vendimeve të botuara në Fletoren Zyrtare./Panorama/ma/me
