Ministri i Mbrojtjes, Pirro Vengu, nëpërmjet një postim në rrjetin social Facebook, ka bërë të ditur se situata e zjarreve në vend mbetet ende kritike.
Vengu ka theksuar se gjatë pasdites do të angazhohen edhe 2 avionë “Canadair” nga Italia dhe Kroacia, për të forcuar më tej ndërhyrjen ajrore.
Gjithashtu, Ministri i Mbrojtjes është shprehur se deri më tani janë neutralizuar nëntë vatra zjarri, të cilat po monitorohen nga afër për të parandaluar riaktivizimin e tyre.
Aktualisht janë 17 vatra aktive në disa qarqe. Puna është duke vijuar për izolimin dhe shuarjen e tyre.
“Në terren janë angazhuar afërsisht 1000 forca, ushtarake dhe civile, të cilat po punojnë pa ndërprerje, nën koordinimin e Shefit të Shtabit të @Forcave të Armatosura, Prefektëve dhe @Agjencisë Kombëtare të Mbrojtjes Civile. Nën koordinimin e AKMC po sigurojmë mbështetjen e mjeteve të Forcës Ajrore në disa zona si Delvinë, Konispol, Berat/Dimal dhe Bërzhitë, me 5 helikopterë të përfshirë në operacione në këto momente. Deri tani janë neutralizuar 9 vatra zjarri, të cilat po monitorohen nga afër për të parandaluar riaktivizimin. Gjatë pasdites pritet të angazhohen edhe 2 avionë “Canadair” nga Italia dhe Kroacia, për të forcuar më tej ndërhyrjen ajrore,” shkruan Pirro Vengu.
