Ndihmës zv.sekretarja e shtetit Nuland ka pasur dy telefonata në 24 orët e fundit, me dy krerët e opozitës, kryetarin e PD basha dhe ish-kryeministrin berisha. Ndërkohë që nga telefonata e bashës me Nuland nuk kanë filtruar veçse informacione të përgjithshme, nga biseda Nuland-Berisha ka filtruar një element konkret i hedhur nga ish-kreu i PD. Berisha i ka thënë Nuland se një rrethanë që do të çonte drejt një kompromisi, do të ishte miratimi i parimit të vendeve të rezervuara.
Natyrshëm që shqiptarët e lodhur me ecejaket e reformës në drejtësi, aq që e kanë idenë se çfarë do të thotë kjo. Le ta shpjegojmë, për ta kuptuar të gjithë se në cilën hulli të rrezikshme po kërkon ta fusë Sali Berisha negociatën finale të reformës në drejtësi.
Hidhini një sy KQZ ose Këshillit Drejtues të RTSH. Aty partitë kanë deleguar propozime dhe emra konkretë, për anëtarët e këtyre dy organizmave. Edhe KQZ, edhe Këshilli Drejtues i RTSH janë ndarë sot sipas kandidatëve që kanë çuar aty partitë me propozimet e tyre. Pra politikisht. Këtë po kërkon të bëjë sot edhe me drejtësinë ish-kryeministri, i cili propozon që 5 nga 11 anetaret e dy organizmave, që janë de facto qeveritë e gjyqësorit dhe të organit të akuzës, pra Këshillit të Lartë Gjyqësor dhe këshillit të lartë të Prokurorisë, të zgjidhen me propozime që vijnë nga partitë politike. Ndërkohë që sipas variantit aktual, këta 5 anëtarë duhet të propozohen nga shoqatat e avoketërve, noterëve etj. Pra, jashtë politikës, jashtë partive që ngatërrojnë gjithçka dhe që kanë krijuar mish-mashin 25 vjeçar të drejtësisë shqiptare.
Ky variant i propozuar nga Berisha është në fakt kapja e drejtësisë nga politika, pasi hedh në forumet vendimmarrëse të gjyqësorit dhe prokurorisë, persona të afërt dhe të pëlqyer nga partitë politike. Thënë ndryshe, një avokat që zgjidhet aty, hyn si teknicien dhe “ngjyhet” në blu ose në të kuqe gjatë rrugës, sipas preferencës së partisë që e ka propozuar. Po synohet që partitë të kenë sërish të drejtën të fusin duart në forumet vendimmarrëse të drejtësisë. A ka më kapje se kaq?!
Gjesti i Berishës në telefon më Nuland shënon në fakt edhe një parakusht që ai po i vendos Bashës në takimin e ardhshëm me Ramën. “Shko dhe negocio në këto terma”, duket sikur thotë ky propozim, që e fut në një hulli pa krye reformën në drejtësi.
