Ish-deputeti i PD Ervin Salianji ishte sot i ftuar në Top Talk ku foli edhe për çështjen e ditës: dënimin me 1 vit e 6 muaj burg që Prokuroria dha për të.
Ndërkohë, ai ndryshe nga sa ka deklaruar më parë, sot tha se nuk i ka njohur më parë dy pratagonistët Albert Veliu dhe Alfred Alizoti të cilët pranuan të inskenojnë çështjen “Babalja”.
“Është një ditë e zezë për drejtësinë, është varrosur drejtësia dhe janë bërë padrejtësi. Albert Veliun dhe Alfred Alizotin nuk i kam njohur më para. Ne verifikuam që Albert Veliu kishte bërë burg me Agron Xhafajn. Provat mbi rastin, komunikimet telefonike i disponon prokuroria.
Kam bërë komunikim me publikun lidhur me këtë skandal. Kemi pasur në fund të tetorit audio-përgjimin për këtë rast. Prokuroria nuk ka çuar materialin origjinal, por një material të dalë nga mediat. Prokuroria ka dashur të shpëtojë vëllain e Ministrit të Brendshëm.
E devijuan çështjen për të tërhequr vëmendjen nga çështja kryesore. Komunikimi i parë i Babales është me Olldashin dhe jo me mua”, tha ai në Top Talk.
Ju kujtojmë se sot, për ish-deputetin Ervin Salianji, prokuroria ka kërkuar 1 vit e 6 muaj burg, që të konvertuara shkojnë në 3 muaj shërbim prove për kallëzim të rremë mbi çështjen që njihet si “Babalja”.
Grupi hetimor grumbulloi të gjitha të dhënat, mori dëshmitë e të gjithë protagonistëve si dhe verifikoi tabulatet telefonike të cilat vendosnin ish deputetin para përgjegjësisë ligjore.
g.kosovari
