Ministri i Mirëqenies Sociale dhe Rinisë, njëkohësisht kandidati i së majtës së bashkuar për Bashkinë Tiranë, është takuar dje me ish-Presidentin e Republikës, Alfred Moisiu, me të cilin ka diskutuar edhe për idetë sesi mund të ndryshojë kryeqyteti për gjatë 4 vjeçarit të ardhshëm. Në këtë takim ka qenë i pranishëm edhe një nga figurat kryesore të socialistëve, ish-kryeministri Pandeli Majko, i cili ishte dhe një prej kandidatëve kryesor në garën brenda PS-së për kandidat për kryetar bashkie. Këtë fakt e ka bërë të ditur vet Veliaj nëpërmjet një postimi në rrjetin social Twitter, ku duke ju referuar pikërisht takimi ai e cilëson Moisiun si” Presidenti im”. “Me Alfred Moisiun dhe Pandin, kujtime për familjet tona ushtarake, ide për qytetin e punën që na pret”, – shkruan Erion Veliaj në postimin e vet.
Mësohet se të tre bashkëbiseduesit kanë vlerësuar nevojën për një rritëm të ri të punëve qytetit, për ta bërë atë të denjë për qytetarët e një vendi që aspiron të bëhet pjesë e BE-së. Siç edhe bënë të ditur vet Veliaj, të tre protagonistët e këtij takimi kanë dhe një emërues të përbashkët pasi vijnë nga familje ushtarakësh.
Presidenti Moisiu ka qenë vet ushtarak i lartë, Pandeli Majko është birë i një ushtaraku, ashtu si edhe vet Veliaj. Ndaj një vend të veçantë në bisedën mes tyre ka zënë edhe kjo çështje. Vetëm një javë më parë Veliaj dhe Majko patën një tjetër takim miqësor mes tyre, ku Majko si një prej përfaqësuesve më me zë të PS-së i ofroi i pari mbështetje për garën për Tiranën.
