Kandidati për Bashkinë e Tiranës Erion Veliaj ka prezantuar ditën e sotme kandidatët e Këshillit Bashkiak për Partinë Socialiste. Të mbledhur në Pallatin e Kongreseve, ku të pranishëm ishin deputetët e PS për Tiranën si dhe simpatizantë të selisë rozë, Veliaj tha se i duhet një ekip për të drejtuar kryeqytetin, sipas modelit të Bashkimit Europian.
Teksa ftoi një nga një në sallë kandidatët për këshillin bashkiak, Veliaj theksoi se ky është ekipi që do ta kthejë Tiranën në drejtimin e duhur. Kandidati i mazhorancës nënvizoi rëndësinë që nga punonjësi i parë i Bashkisë, deri tek i fundit, duhet ta dinë rëndësinë dhe misionin e detyrës së tyre.
“Të gjithë bashkë sot jemi qytetarë të bashkisë së re të Tiranës. Sot është dita e Europës. Sot ndodhin gjera të mrekullueshme kur jemi bashkë. Në bashkinë e Trianës, nga i pari tek i fundit, ai që pastron rrugët, nuk e ka kuptuar asnjë rolin e tij. Katër vite, qyteti i lënë në harresë, dhe asnjë se di se çfarë misioni ka. Ne besojmë në një parti dhe në një qëllim dhe secili e di që është aty ku do Tiranën Europiane. Nga ai që korr barin, tek ai që vë poçat, duhet të kuptojë që ne jemi një ekip, për një qytet ku jetojmë të gjithë. Fitorja nuk erdhi vetëm, pasi Edi Rama kishte nevojë për një ekip, ndaj asnjë nuk ja del dot vetëm.”, tha Veliaj.
Më herët në fjalën përshëndetëse Ministri i Brendshëm Saimir Tahiri tha se Shqipërisë duhet ti jepet ‘Drejtimi i duhur’.
“T’i japim Shqipërisë drejtimin e duhur. Zyra e Bashkisë së Tiranës është kthyer në zyrë partie. Bashkë me Erionin do të bëjmë një ekip fitues”, tha Tahiri.
Redaksia Online
(JavaNews.al)
