Kandidati i madhorancës për bashkinë e Tiranës Erion Veliaj ka theksuar se nuk ka si synim drejtimin e Partisë Socialiste por të kthejë Tiranën në drejtimin e duhur, ashtu siç edhe ka sloganin në këto zgjedhje vendore.
I ftuar në emisionin “5 Pyetje nga Babaramo” Veliaj tha se nuk po e përdor bashkinë e Tiranës si një trampolinë për të qenë kryetar i Partisë Socialiste. Përkundrazi, Veliaj tha se synon që t’i japë Tiranës një kryebashkiak me kohë të plotë.
Ish-ministri nënvizoi se nuk do të bëjë projekte çudibërëse por se të paktën do kujdeset për pusetat dhe poçat e kryeqytetit.
“Nuk jam këtu për këtë por për ti thënë qytetarëve se çfarë jam i gatshëm të bëj për Tiranën e cila tani është bërë një qytet i pajetueshëm. Nuk kam ambicien se çfarë do të ndodhë më pas por kam qëllimin që të ndryshoj Tiranën dhe ti jap atë që duhet. Sigurisht që do të ndërhyjmë. Do të inkurajojmë planin e qeverisë për ndërtimin. Na duhet një Bashki që bashkëpunon me Qeverinë. Kemi një shans për të pasur një Bashki aleate me qeverinë. Duhet së pari të zhvillojmë zonën te Kopshti Zoologjik dhe Botanik e në zonën e liqenit ku nuk është ndërruar asnjë poç. Basha e vodhi bashkë me Berishën bashkinë e Tiranës. Në tre vjet ishin bashkë. Po më gjete një kapak pusete në 3 vite që kanë qeverisur bashkë unë tërhiqem nga gara.” tha Veliaj
