Kandidati i majtë për Bashkinë e Tiranës, Erion Veliaj ka mbyllur mbrëmë fushatën e tij në zonën e Dajtit. Në mitingun e zhvilluar me qytetarët e Dajtit, Veliaj u zotua se do të shërbejë 24 orë në 7 ditë të javës.
Veliaj theksoi se nën qeverisjen e tij, qytetarët nuk do të ndahen në të majtë dhe të djathtë por do të shërbehet për të gjithë, pa dallim.
Puna në ekip dhe përkushtimi sipas Veliajt do të jenë lokomotiva e tij në krye të bashkisë.
“Unë jam në këtë garë bashkë me ju, që jeni ekipi ynë, për të mos i ndarë njerëzit, por për t’i bashkuar ata, për të mos i përçarë njerëzit, por për t’i shërbyer atyre. Nuk ka diferencë mes të majtëve dhe të djathtëve kur duan shërbime nga bashkia. Nuk ka diferencë mes një prindi të majtë dhe një prindi të djathtë, të dy duan një shkollë me ngrohje. Nuk ka diferencë mes një nëne të majtë dhe një nëne të djathtë. Të dyja duan që qyteti të mos ketë puseta të hapura. Nuk ka diferencë mes një gjyshi të majtë dhe një gjyshi të djathtë, të dy duan që të kenë trotuare ku të ecin si njerëz, të kenë një shesh pushimi, të kenë një lulishte ku të çlodhen.”, tha Veliaj.
