Është bërë tashmë traditë që “MotoFest Steelwings MC Albania” zhvillohet çdo vit duke mbledhur të gjithë dashamirësit e Harley Davidson, aventurave me motorra dhe sigurisht muzikës rrok. Ky është viti i tetë që ky takim realizohet dhe vazhdon të pritet me shumë kënaqësi nga publiku.
Sot kryetari i Bashkisë së Tiranës, Erion Veliaj ishte i pranishëm në Sheshin “Italia” për të përshëndetur nga afër motorristët e “Steelwings Motorcycle Club Albania” për atmosferën e krijuar në kryeqytet për tre ditë me radhë. Veliaj tha se ky është një projekt bashkëpunimi mes Bashkisë së Tiranës dhe Fondacioni EDS me qëllim kryesor argëtimin e publikut.
Sipas kreut të bashkisë ky aktivitet është mjaft i rëndësishëm pasi i shërben promovimit të turizmit në Shqipëri. “Tirana po promovohet sot si një nga ato qytetet evropiane turistike edhe sa i takon kulturës së transportit rrugor. Transporti në Tiranë kryhet me makina, ndërkohë që lëvizjet e qytetarëve mund të kryhen edhe me motorë ose me biçikletë duke qenë se infrastruktura është e ndërtuar për vetëm 200 mijë banorë në kushtet kur sot kryeqyteti ynë numëron 1 milionë banorë”, tha kreu i bashkisë.
Ai falenderoi “Steelwings Motorcycle Club Albania” për promovimin e një transporti tjetër që është edhe më ekonomik, ai me motorr ose biçikletë. “Në këto kushte ku ndodhet qyteti i Tiranës, ku kemi hapur shumë kantiere ndërtimi, duhet të investojmë shumë, jo vetëm në infrastrukturë, por edhe në kulturë, dhe ky aktivitet i sotëm është një investim i mirë në kulturën se si mund të përdorim një transport më ekonomik dhe se si mund të jemi më të përgjegjshëm në rrugët e Shqipërisë”, tha Veliaj.
Gjithashtu, tha Veliaj, “Steelwings Motorcycle Club Albania” promovon faktin se kur konsumohet alkool nuk përdoret motorri apo makina. Sipas Veliajt, “Steelwings Motorcycle Club Albania”, të gjithë këta elementë të kulturës i ka promovuar në mënyrë fantastike. “Këto tre ditë, tha ai, i kanë dhënë hare dhe gjallëri Kryeqytetit, ndërsa ftoi që në edicionin tjetër të marrin pjesë më shumë dashamirësit e Harley Davidson.
Veliaj informoi se falë punës së bërë, Tirana ka ndryshuar totalisht kulturën e ecjes në rrugë. Statistikat na kanë treguar, shtoi si, se në vitin e fundit është trefishuar numri i qytetarëve që përdorin motorr. Ky, sipas tij, është një lajm shumë i mirë.
“Nëse vazhdojmë me këtë trend, atëherë do të ketë ditë të mira për Tiranën, pasi ashtu si çdo qytet do të ketë shumëllojshmëri të përdorimit të mjeteve të transportit për distanca të ndryshme”, nënvizoi kreu i Bashkisë së Tiranës. Të gjithë, tha ai, duam një Tiranë aktive dhe të shëndetshme dhe sa më shumë aktivitete të tilla, aq më mirë do të jetë për kryeqytetin që e duam shumë.
D.I.
