Fundi i fushatës në atë që konsiderohet si zona më rozë e Tiranës. Erion Veliaj përmbylli sot fushatën në njësitë 5 dhe 10 në Tiranë. Në krah të tij ishin deputetët Xhafaj dhe Majko. Fatmir Xhafaj u shpreh se “Erioni është njëri prej jush, ka pasion të luftojë, kurajo, ambicie për të punuar për ta bërë jetën më të mirë. Më 21 qershor votoni Erion Veliaj”.
Duke folur para zgjedhësve, Pandeli Majko tha se “Sot në këtë shesh të mbushur si asnjëherë tjetër, i themi Tiranës se ka nisur festa e fitores së PS dhe koalicionit të saj”. “Një milion shqiptarë si asnjëherë tjetër do të japin një mesazh, një kumt të qartë ashtu si ky liqen, që furnizohet nga shiu, ashtu si votat tona do ta mbushim kutinë e votimit me numrin 6, do votojnë për ëndrrën që vjen”, tha ai.
Pandeli Majko ka preferuar të japë edhe një përgjigje për ata që akuzojnë për blerje vote shumicën qeveritare. “Shpresa fillon tek vota e lirë dhe e ndershme, pavarësisht se ata thonë po blejnë votën, nuk ka ndodhur ndonjëherë të blejnë votën socialistët, të trokasin tek dera me para. Të kthejmë kokën mbrapa dhe të shikojmë ku ka nisur ky zakon, tek ata që kanë rënë nga fiku dhe duan të hypin sërish duke na akuzuar për atë që jo vetëm ndërkombëtarët por të gjithë i tregonin me gisht”.
