Pas këndit të lojërave për fëmijë te Parku i Liqenit, Bashkia e Tiranës vijon punën intensive për hapjen çdo muaj e një këndi të ri në çdo lagje. Edhe fëmijët në bllokun e pallateve te Mine Peza prej disa ditësh luajnë në këndin e ri të përuruar nga Veliaj, që tashmë është shndërruar në një ambient çlodhës edhe për banorët.
Ndërkaq, edhe pak orë dhe një kënd tjetër i ri lojërash është gati përballë Presidencës. “Për pak orë jemi gati! Pas Liqenit e Mine Pezës ky është këndi i tretë. Do të pasohet nga këndet tek Materniteti i Ri dhe në Laprake. Mënyra më e mirë për të nisur vitin dytë. Kur fëmijët e Librit Universitar të jenë kthyer nga pushimet do gjejnë park e kënd lodrash”, ka shkruar Veliaj në rrjetet sociale.
Me sa duket beteja Veliaj-Nishani për parkun e lojërave të Liqeni po mbyllet me këtë kënd të ri poshtë zyrës së Presidentit, i cili nga kjo javë do t’i duhet të dëgjojë edhe thirrjet e gëzueshme të fëmijëve teksa luajnë aty.
