Një vendim i papritur i Gjykatës së Apelit administrativ, ka vendosur që t’i japë të drejtën e vijimit të punimeve kompanisë Gener2, e cila po ndërton pranë digës së liqenit një kompleks me 5 kulla, nga 17 kate secila. Trupa gjykuese nuk ka njoftuar në proces Bashkinë e Tiranës dhe IKMT-në, palë të cilat kishin hedhur në gjyq kompaninë për heqjen e lejes së ndërtimit në zonën pranë digës. Vendimi në fshehtësi i Gjykatës ka sjellë rrëzimin e kërkesës së Bashkisë për të ndërruar trupën gjykuese. Pas këtij vendimit ka ardhur dhe reagimi i kryebashkiakut Erion Veliaj, i cili ka thënë se trupa gjykuese ka konflikt të hapur interesi me kompaninë Gener2, pasi gjykatësit e çështjes janë të njohur dhe familjarë të pronarit të kësaj kompanie.
“Bashkia e Tiranë i kanë kërkuar gjykatës se familjarë të ndërtuesve, të njerëzve që janë aksionerë të kompanive, janë ata që do të gjykojnë çështjen nesër. Bëmë një kërkesë në Gjykatë, se kjo trupë është e manipuluar, ne kërkuam ndryshmin e kësaj trupe. S’mund të kemi dy familjarë, njëri që e justifikon lejen dhe një që e rrëzon. Nuk është shpallur data dhe ora e gjyqit, por në një fshehtësi kriminale, një gjyqtare ka rrëzuar kërkesën për ndryshimin e trupës. Ja pse është emergjente dhe ulëritëse nevoja për reformë në drejtësi. Bashkia e Tiranës nuk është njoftuar për datën dhe as nuk është ftuar si palë.”- tha veliaj.
Kryebashkiaku Veliaj ka ripërsëritur edhe një herë kërkesën drejt Presidentit Nishani, se përse ai nuk prononcohet për këtë skandal, si dhe se përse, Sali Berisha, i cili ka zyrën e tij në pallatin në pronësi të po të njëjtës kompani, nuk flet për rastin në fjalë. Veliaj ka kërkuar nga qytetarëet që nesër të jenë të pranishëm në seancën e rradhës së gjyqit, duke ftuar edhe shoqërinë civile dhe ambientalistët, për të prprotestuar kundër vendimit të papritur të trupës gjykuese.
“Fajtor për vendimin e nesërm është Bujar Nishani, Sali Berisha e Lulzim Basha. Ata njerëz që e shkatërruan Shqipërinë kur ishin në pushtet, sot kontrollojnë gjyqësorin dhe nesër do të vendosin për shkatërrimin e Tiranës. Premtimi im publik sot, është sa të kem jetë dhe sa të votohem nga qytetarët e Tiranës, do të mbroj interesat e qytetarëve të Tiranës”, theksoi Veli. javanews/ a.k
