Gjykata Administrative e Apelit është tërhequr nga vendimi për të gjykuar sot me treshen e gjyqtarëve Arjana Qafa, Enkelejda Metaliaj dhe Alkelina Gazidede dy çështjet gjyqësore që lidhen me ndërtimin e pallatit 17 katesh te Diga e Liqenit.
Protesta qytetare e thirrur nga Bashkia e Tiranës ka bere qe treshja e gjyqtareve te terhiqej duke e shtyrë për te premten, datë 13 maj, shqyrtimin e dy kërkesave, njëra e paraqitur nga IKMT për shfuqizimin e lejes së ndërtimit për pallatin 17 katesh dhe tjetra e firmës ndërtuese “Gener 2” kundër IKMT që kërkon lejimin e punimeve për këtë pallat.
Lajmin e ka dhene kryetari i Bashkisë së Tiranës, Erion Veliaj para protestuesve të shumtë, të cilët për afro 3 orë i kërkuan Gjykatës drejtësi. “Sapo na erdhi lajmi i mirë, është shtyrë edhe gjyqi tjetër. Kjo ishte fitorja jonë, kjo ishte fitorja juaj, kjo ishte fitorja e qytetarëve që nuk mund të kenë paratë, muskujt dhe mbiemrat e këtyre por që kanë të drejtën me vetë. Shtyrja e gjyqeve sot provoi që ne që dje kishim të drejtë, që anulimi i kërkesës sonë dje ishte i gabuar. Pra kur gjykata do gjykata mundet dhe kur gjykatës i hapen sytë nga presioni i popullit, gjykatat e njohin si jepet drejtësi”, – tha Veliaj.
Por ai shtoi se dy vendimet e sotme të Gjykatës janë vetëm një fitore e vogël, pasi ai theksoi e rëndësishme është fitorja e madhe, ajo që ka të bëje me shpalljen të pavlefshme të lejes së ndërtimit të këtij pallati. “Ju falenderoj të gjithëve nga zemra por kini kujdes, kemi fituar një betejë por nuk kemi fituar luftën. Kemi shtyrë gjyqet deri sa të fillojë gjyqi për të hequr këtë trup gjykuesish dhe të caktohet një trup tjetër. Kemi fituar një betejë, por nuk kemi fituar luftën”, tha Veliaj ndërsa shtoi se deri në fitoren e madhe qytetarët do duhet të dalin sërish në shesh. (javanews.al / a.r)
