Avokati Sokol Hazizaj, i ftuar në emisionin Log. në News 24 ka kritikuar kryeministrin Edi Rama për mungesën e mbrojtjes ligjore për kryebashkiakun e Tiranës, Erion Veliaj, i cili ndodhet në paraburgim si i dyshuar për disa vepra penale.
Sipas Hazizajt, Rama po angazhohet vetëm në fushata politike dhe nuk ka bërë asnjë përpjekje për të siguruar prova që mund të ndihmojnë Veliajn.
Hazizaj theksoi se, përveç avokatëve të tij, Veliaj nuk ka mbështetje ligjore nga asnjë tjetër, duke përfshirë kryeministrin. Ai shtoi se mbrojtja ligjore për Veliajn po bëhet vetëm nga ekipi i tij i avokatëve dhe jo nga politikanë të tjerë që mund të kishin ofruar mbështetje.
Në këtë kontekst, Hazizaj theksoi se Rama dhe administrata e tij janë tërhequr nga mbrojtja ligjore e Veliajt, dhe këtë mund ta provojnë mungesa e reagimeve dhe përpjekjeve konkrete për të identifikuar prova që do të ndihmonin kryebashkiakun e Tiranës.
Sokol Hazizaj: Po të shohësh deklarimet që po bën sot Rama me “Sy më sy”, po tregon që ai nuk është sebepi i kësaj. Po nuk kam parë asnjë përpjekje të tij në identifikimin e provave në ndihmë të kryetarit të Bashkisë, vetëm politikë po bën. Ai ka disa këshilltarë juridik, kë një korpus të madh, të marri dosjen, të thotë ‘gjeni provat kundër atyre të prokurorëve’.
Kryetari që është i dyshuar, përveç avokatëve të tij, nuk ka asnjë avokat tjetër, duke filluar që nga kryeministri. Do të thotë që e ka lëshuar. Mbrojtjen Veliajt po ia bën vetëm avokati i tij.
