Është hapur në ambientet e Muzeut Kombëtar ekspozita me piktura “Shije nga Tirana”. Në çeljen e kësaj ekspozite ishte i pranishëm edhe Kryetari i Bashkisë së Tiranës, Erion Veliaj, i cili e quajti atë një kartolinë të bukur të qytetit të pikturuara nga vetë artistët gjatë vizitës së tyre në Shqipëri.
“Në të gjitha sezonet që kemi pasur organizime të tilla, ato nëpër Shqipëri dhe ato që kanë qenë ekskluzive për Tiranën, kjo e fundit ka qenë ndoshta kartolina më e bukur e Shqipërisë e përjetuar nga njerëzit në vetë të parë që impresionet e tyre, të cilët provokimin që shoqëria, natyra, jeta jonë sociale prodhon, ta përkthejë në një punë të dobishme”, u shpreh Veliaj.
Kryetari i Bashkisë së Tiranës tha se në Shqipëri ka një mungesë të atyre që janë njerëz artistë dhe që besojnë tek e bukura, tek e mira. “E them këtë sidomos edhe në kontekstin e gjërave që po ndodhin. Shikojmë se sa e stresuar është bërë jeta jonë, nuk guxon dikush të kalojë trotuarin sepse i vjen një tjetër me shumë stres dhe me një shpejtësi për t’i shkaktuar një tragjedi. Se si ndezim televizorin dhe çdo gjë trajtohet me notat më agresive ku poshtërimi i tjetrit është një qëllim në vetvete, ku përçudnimi i të bukurës, i të mirës është një arritje e madhe”, vijoi Veliaj.
Ai shprehu besimin se në këtë betejë kulturash, mentalitetesh, është shumë e rëndësishme që të kemi kontributin e një gjëje të bukur, e një gjëje të mirë, e një gjëje të fisme. “E kam vënë re që në të gjithë vendet në Tiranë ku ne investojmë me një instalacion siç është Reja apo në vende të tjera, aty ku ka një ekspozitë dhe ku prodhohet diçka e mirë dhe e bukur, njerëzit flasin me zë më të ulët, nuk bërtasin, nuk ulërasin, nuk e shajnë njëri-tjetrin, bëhet më pak pis sepse gjëja e bukur automatikisht imponon një sjellje më qytetare”, tha Veliaj. Sipas tij, jetojmë në një qytet ku ne na duhet shumë bashkëjetesë, shumë mirëkuptim, shumë tolerancë. “Kemi nevojë për më shumë mirëkuptim, edhe nga gjërat më banale si kalimi i rrugës apo te gjërat më të rëndësishme siç mund të jenë marrëveshjet e mëdha politike që e çojnë vendin në një stad tjetër zhvillimi dhe këtë debat kemi edhe sot në politikën e madhe”, theksoi kryetari i Bashkisë së Tiranës.
Në fund të fjalës së tij, Veliaj vlerësoi bashkëpunimin e Bashkisë së Tiranës me Shoqatën Kulturore VIZart për të prodhuar diçka të bukur. “Shpresoj që në këto ditë vape ky do të jetë një oaz për të marrë pak hije, për të parë diçka të bukur dhe për të dalë më të frymëzuar në një Tiranë që ka gjithmonë e më shumë nevojë për frymëzim”, përfundoi Veliaj.
Artisti dhe kuruesi i ekspozitës “Shije nga Tirana”, Helidon Haliti, u shpreh se ky aktivitet zhvillohet për t’i treguar botës që kemi oreks për të punuar. “Ndërkohë që këtu thërrasim artistë nga bota për të treguar që kemi oreks për të bashkëpunuar. Nuk do ta zgjas më shumë, do të falenderoj padyshim mikpritësit e Muzeut Kombëtar, por dhe Ministrinë e Kulturës, dhe mbi të gjitha Bashkinë e Tiranës që na ka thënë një mbështetje të jashtëzakonshme për ta bërë të mundur këtë ekspozim dhe të kuruar me elegancë”, tha Haliti.
Në ekspozitën “Shije nga Tirana” janë të paraqitura punë nga 20 artistë prej shteteve të ndryshme si India, Kina, Malajzia, Ukraina, Bullgaria, Kanadaja, Kosova etj., të cilët kanë zhvilluar një turn në Shqipëri dhe kanë pikturuar në teknikën e akuarelit. Disa prej punimeve të tyre më të mira të pikturuara në qytetet Tiranë, Shkodër, Divjakë dhe Pogradec, do të jenë të hapura për publikun nga data 13 – 28 Korrik.
ma.me
