Kandidati i mazhorancës për bashkinë e Tiranës Erion Veliaj ka vijuar takimet e tij me shtresa të ndryshme të shoqërisë duke shpalosur projektet e tij për kryeqytetin. Paraditen e sotme ai ka zhvilluar një takim me biznesin ku ka shprehur gatishmërinë për të rritur bashkëpunimin bashki-biznes. Veliaj ka prezantuar idenë e tij për të realizuar këtë synim, ndërsa është shprehur i hapur për ide të tjera.
“Vlerësoj bashkëpunimin që kemi pasur me biznesin në 18 muajt e fundit dhe dëshiroj që këtë bashkëpunim ta shtrij edhe në Bashkinë e Tiranës. Për këtë, unë kam propozuar ngritjen e këshillit ekonomik në bashki. Ndërkohë, mirëpres çdo ide që ju mund të keni për këtë bashkëpunim”, ka thënë Veliaj.
Nga ana e tyre, sipërmarrësit shprehën dëshirën e tyre për pjesëmarrje më të madhe të biznesit në vendimmarrjen e bashkisë, përmes një përfaqësie të posaçme, në mënyrë që, përpara se ky institucion të vendosë për taksa apo tatime, kjo kategori të japë idetë e saj.
Redaksia Online
(JavaNews.al)
