Një nga figurat më famëkeqe të mafias italiane Salvatore “Toto” Riina ka ndërruar jetë mëngjesin e sotëm.
Bosi i mafias siciliane ka vdekur në moshën 87-vjeçare, si pasojë e kancerit, raportojnë mediat italiane.
Toto Riina u burgos në vitin 1993 dhe u ndëshkua me 26 dënime të përjetshme, pasi besohet se ka urdhëruar më shumë se 150 vrasje.
Qelia e tij gjatë gjithë kohës ka qenë nën përgjim, ndërsa Riina përgjatë 24 viteve në burg ka ndjekur një strategji kokëfortë: Ka folur pafund për rolin e tij në Italinë e 45 viteve të fundit, duke mohuar gjithmonë se ka qenë një pupac në duart e forcave kulte brenda shtetit.
“Kam qenë gjithnjë një burrë nderi, një person serioz”, thoshte vazhdimisht në qeli “Il Capo dei Capi”. “Unë jam një mendimtar i madh. Jam krenar për gjithë sa kam bërë.”
Përveçse akuzohet për një numër të madh vrasjesh të nivelit shtetëror, Toto Riina është përfolur gjatë për lidhjet e tij me politikën. I famshëm është takimi me ish-kryeministrin Giulio Andreotti, ku Riina thoshte se konsultoheshin shpesh bashkë. Gjithsesi, me vdekjen e tij shumë sekrete të Italisë së 45 viteve të fundit u varrosën përfundimisht.
a.ç
