Një tjetër gjeneral rus raportohet se ka humbur jetën gjatë luftimeve në Ukrainë.
Zëvendëskomandanti i ushtrisë së 8-të të forcave të armatosura ruse, Vladimir Petrovich Frolov, ka humbur jetën, informon agjencia ruse e lajmeve TASS.
Lajmi u konfirmua nga guvernatori i Shën Petersburgut, Alexander Beglov.
“Vladimir Petrovich Frolov humbi jetën heroikisht në betejë me nacionalistët ukrainas”, tha ai.
Guvernatori u shpreh se “Frolov sakrifikoi jetën e tij që fëmijët, gratë dhe të moshuarit në Donbas të mos dëgjonin më shpërthime bombash. Që njerëzit të mos prisnin më vdekjen dhe të largoheshin nga shtëpia, po të thoshin ‘mirë u pafshim’ sikur të ishte hera e fundit.”
Gjatë gjithë luftës, disa gjeneralë rusë dhe personel ushtarak të rangut të lartë raportohet se janë vdekur.
Ministria e Mbrojtjes e Ukrainës tha në një postim në Facebook se rreth 20.300 ushtarë rusë ishin vrarë që nga 24 shkurti, fillimi i pushtimit rus.
Rusia u përgjigj duke thënë se humbjet e pësuara nga ushtria e Ukrainës arritën në 23.367 trupa, edhe pse nuk tha nëse kjo përfshinte vetëm ata që kishin vdekur ose që ishin plagosur, sipas agjencisë së lajmeve Reuters.
Të dyja palët ndryshojnë gjithashtu në atë se sa të hapur janë në pranimin e humbjeve të tyre.
Në një intervistë për CNN të premten, presidenti Volodymyr Zelensky tha se rreth 3.000 ushtarë ukrainas janë vrarë që nga fillimi i luftës, ndërsa Rusia është më ngurruese për të përditësuar publikisht shifrat e saj.
Më 25 mars, ministria e saj e mbrojtjes tha se 1.351 ushtarë rusë ishin vrarë në luftime deri më tani.
/b.h
