Vdekja e midhjeve të Butrintit
Një proces i ngadaltë ngordhjeje i midhjeve po ndodh këto orë në liqenin e Butrintit, ku temperatura e lart e ujit ka demtuar rreth 60% të prodhimit, sipas kultivuesve lokalë. Temperaturat në thellësinë 1 metër janë rreth 33 gradë celcius, një rrethanë që po vret gradualisht midhjet, të cilat duan ujë të fresket për rritje dhe riprodhim.
Kultivuesit shprehen se mosfreskimi i liqenit nga Kanali i Vivarit e bën të pamjaftueshme ndërhyrjen e ujërave të Bistricës. në keto kushte prodhimi i këtij viti që llogaritej 18 mijë kuintalë, është praktikisht i demtuar në mënyrë të pakthyeshme. Kanë mbijetuar vetëm midhjet që do përdoren vitin e ardhshëm për riprodhim.
Në këtë situatë Ministria e Bujqësisë kërkon zhvendosjen e përkohshme të midhjeve në zonën bregdetare të detit Jon në gjirin e Butrintit dhe alokimin e tyre sipas koordinatave të përcaktuara nga ekspertët. Por kultivuesit thonë se kjo s’mund të bëhet pasi është vonë dhe sepse largësia nga bregu, që kërkohet nga ministria, është e pamundur për shkak të thellësisë së detit Jon në atë distancë.
Liqeni i Butrintit ka një sipërfaqe rreth 1600 hektare dhe numëron aktualisht rreth 78 impiante midhjesh, prej të cilave gati 68 janë në gjendje pune.
