Tre mjekë dhanë dëshmitë e tyre në procesin kundër dy kolegëve që akuzohen për mjekim të pakujdesshëm, me pasojë vdekjen e Dorjana Hakës, gruaja e portierit të Partizanit, Alban Hoxha. Ajo u nda nga jeta pak ditë pasi e reja kishte sjellë në jetë fëmijën e parë.
Orion Gliozheni, mjek në maternitetin “Koço Gliozheni”, përgjatë gjithë dëshmisë së tij, “shfajësoi” dy mjekët e akuzuar P.R. dhe E.B.. Gliozheni i tha gjykatës se në rastin e Dorjana Hakës, pacientes i janë kryer të gjitha analizat e duhura. Mandej ai theksoi se Dorjana Haka është futur në operacion pas të gjitha konsultave të duhura.
Duke iu referuar aktekspertizës mjeko-ligjore, Gliozheni theksoi se ata nuk janë mjekët e specializuar për të kryer një akt të tillë.
Pas tij, para gjykatës dëshmoi mjekja e një klinike private, e cila ka ndjekur përgjatë 9 muajve shtatzëninë e Dorjana Hakës, duke theksuar se në asnjë moment e reja nuk ka shfaqur problem dhe se analizat i ka pasur gjithmonë brenda normave.
Mjeku neurokirurg Thoma Kalefi tha se pas vdekjes, familjarët e Dorjana Hakës nuk kanë dashur që të ndjerës t’i bëhet autopsia. Seanca e radhës do të vazhdojë me pyetjen e dëshmitarëve të tjerë. Mjekët e maternitetit “Koço Gliozheni” u vunë nën akuzë nga prokuroria, e cila nisi hetimet pas kallëzimit që bënë familjarët e të ndjerës.
BalkanWeb
