Ministria e Shëndetësisë ka reaguar sot për ngjarjen tragjike në një spital privat ku humbi jetën Blerta Pepa.
“MSH shpreh ngushëllimet më të sinqerta familjes së 15 vjeçares B.P., e cila humbi jetën pas komplikimeve shëndetësore, gjatë një ndërhyrjeje kirurgjikale në një spital jopublik në Tiranë. Jemi pranë familjarëve në këto momente dhimbjeje të rëndë për humbjen e vajzës së tyre” – shkruhet në njoftim.
Në të njëjtën kohë, Ministria e Shëndetësisë bën të ditur se po ndjek nga afër ecurinë e gjendjes shëndetësore të mjekut reanimator, i cili po lufton me vdekjen në këto orë të vështira.
“Në pritje të përfundimit të hetimeve dhe daljes së rezultateve të ekspertizës mjeko-ligjore, Ministria e Shëndetësisë ka ngritur grupin e punës për ndjekjen e këtij rasti dhe do të marrë masat e duhura për këtë ngjarje të rëndë” – njofton MSH. /b.d
