Vetëm pak pas ngjarjes tragjike në Burgun e Shkodrës, ku 20-vjeçari rumun Nicolae Ionnut Erion Deliver humbi jetën në rrethana ende të paqarta, Ministri i Drejtësisë Besfort Lamallari publikoi një postim emocional në rrjetet sociale me mesazhe për shoqërinë.
Ai shkruan se të rinjtë nuk duhen braktisur as kur gabojnë, duke sjellë si simbol një pikturë të realizuar nga një i ri i privuar nga liria në Institutin e Kavajës.
Në postim, ministri flet për besimin, kujdesin njerëzor dhe mundësinë për të ndryshuar jetën e të rinjve, duke apeluar për t’i dhënë fund gjyqeve publike.
Reagimi erdhi fill pas vdekjes së të riut në burgun e Shkodrës, i cili ishte arrestuar që në moshën 18 vjeçare për prodhim dhe shpërndarje të lëndëve narkotike.
Trupi i pajetë po i nënshtrohet ekspertizës mjeko-ligjore për të hedhur dritë mbi rrethanat e vdekjes së tij, teksa siç është raportuar dyshimet janë se lëvizja është bërë me vonesë vetëm pasi ishte vënë re gjendja e tij e rënduar shëndetësore.
Postimi i plotë i ministrit Lamallari:
Një telajo, disa ngjyra… dhe një botë emocionesh.
Kjo pikturë e Florianit, një i ri i privuar nga liria është dhurata më e veçantë dhe kuptimplotë, e cila qëndron tashmë përballë skrivanisë time, me 1 milionë arsye për të bërë gjithmonë gjënë e drejtë dhe të duhur, pavarësisht sfidave apo momenteve më të dobëta që na servir jeta, gjërave të mbrapshta që kemi trashëguar, duke përfshirë mendësitë atavike, presionin shoqëror apo moralizimin mbi ‘nderin’ dhe ‘hakën’!
Floriani ishte vetëm 4 vjeç kur humbi thuajse gjithçka…një tragjedi familjare e mbërthyer në një sagë gjakmarrjeje, e cila vite më pas do të përfshinte dhe vetë atë, ndonëse ende me forcën e gjykimit, emocionet dhe brishtësinë e një të mituri përballë presionit shoqëror mbytës, moralizimit të dalë boje dhe ‘gjyqeve’ publike të tjetrit, të cilat për fat të keq mbeten ende sot e kësaj dite, sporti i preferuar kombëtar për të shumtë midis nesh!
Në çdo penelatë ka reflektim, pendesë, shpresë dhe një thirrje të heshtur për t’u parë jo si gabim, por si njeri!
Pas mureve të larta dhe dyerve të mbyllura të Institutit për të Miturit në Kavajë, ka kaq shumë ëndrra që kërkojnë dritë.
Kjo pikturë është një kujtesë se fëmijët dhe të rinjtë nuk duhen braktisur kurrë — as kur gabojnë.
Sepse besimi, kujdesi dhe ngrohtësia njerëzore në momentin e duhur mund të ndryshojnë më shumë se një jetë.
Faleminderit Florian për këtë mesazh të paçmueshëm, i cili buron nga talenti yt që rrjedh në deje dhe nga forca shpirtërore për të lënë pas të shkuarën dhe pikturosh të ardhmen me ngjyrat që vetëm ti do të zgjedhësh, ashtu si në këtë kujtim plot shpresë dhe dritë, të cilin do ta ndaj me një kënaqësi të veçantë dhe shumë besim tek ty me këdo që mirëpres në Ministria e Drejtesisë.
