Partia Socialiste, dega Vau Dejës hodhi poshtë deklaratat e Partisë Demokratike për parregullsi në zgjedhjet e 30 qershorit në këtë bashki,duke i cilësuar absurde dhe qesharake.
Sekretari për marrëdhëniet me publikun në PS Vau Dejës, Agron Ceka tha sot, se procesi në bashkinë Vau Dejës ka qenë i rregullt.
Sipas Cekës, ditën e shtunë pas mesnate kanë mbërritur të gjitha materialet zgjedhore tek KZAZ 6 Bushat të cilat u dogjën pak ditë përpara 30 qershorit dhe të pranishëm kanë qenë vëzhguesit e OSBE ODIHR duke cilësuar të pavërteta pretendimet e PD se këto materiale mëngjesin e 30 qershorit kanë qenë në doganën e Hanit të Hotit. Ceka thotë se ish kryebashkiaku i Vau Dejës, Zef Hila ka pranuar publikisht në media se sulmi për djegien e KZAZ 6 është bërë nga vetë PD duke qenë kontradiktor me deklaratën e sekretarit Bardhi se ai sulm ishte një skenar i PS.
Ceka hedh poshtë edhe pretendimet për anëtaren PS të KZAZ 6 në Bushat Kristina Ndoja duke thënë se kjo e fundit ka dhënë dorëheqjen si kandidate për këshillin bashkiak të Vau Dejës dhe e ka paraqitur atë në KQZ.
Ky reagim i PS Vau Dejës vjen si kundërpërgjigje pas deklaratave dhe pretendimeve të PD lidhur me zgjedhjet e 30 qershorit në atë bashki.
Më herët, edhe anëtari i KQZ, Bledar Skënderasi theksoi se fletët e votimit për bashkinë e Vaut të Dejës u prodhuan në Slloveni.
