Ministri i Bujqësisë, Zhvillimit Rural dhe Administrimit të Ujërave, Edmond Panariti, i shoqëruar nga kryetari i Bashkisë së Vaut të Dejës, Zef Hila, inspektoi sot nga afër punimet ndërtuese dhe rehabilituese të kanaleve ujitës dhe kullues të zonës së Vaut të Dejës.
Investimet e realizuara në kohë, në bashkëpunim edhe me pushtetin vendor, garantojnë vaditjen e plotë të 12000 hektareve tokë bujqësore të kesaj zone.
Njëkohësisht, ekspertet po punojne me intensitet për thellimin dhe riparimin e shtratit të lumit Drin, në nyjën e Gjadrit, në një segment prej 2,5 km, që ka gati 30 vite pa u pastruar.
Ministri Panariti u shpreh se këto punime do të bëjnë të mundur përballimin e situatave të pritshme të shirave në shtator dhe së shpejti një flotë e re ekskavatorësh do të jetë në dispozicion të bordeve dhe bashkive për ndërhyrjet në rrjetin e kanaleve.