Kreu i grupit parlamentar Petrit Vasili deklaroi se në rast të mosvotimit të reformës në drejtësi nga ana e opozitës, LSI është pro një referendumi, që do t’ja lërë në dorë qytetarëve çështjen, për të cilën politika prej kohësh nuk gjen dot konsensus. Një qëndrim i tillë është ndryshuar nga LSI, pasi vetëm dy ditë më parë ka qenë Ilir Meta ai i cili e ka cilësuar si “qesharake” idenë e referendumit për këtë çështje, duke ju referuar rekomandimit 88 që kërkon opozita.
Vasili i ka bërë thirrje Kryeministrit Rama dhe liderit të opozitës Basha që të lënë mënjanë daljet e tyre televizive, pasi nuk i sjellin asnjë të mirë procesit të reformës në drejësi. Në emër të LSI-së, Vasili kërkoi nga BE që të marrë përsipër për të dhënë një gjykim në lidhje me rekomandimin 88 të Komisionit të Venecias si dhe të japë garanci, se në rastin e çuarjes së reformës në mënyrë të njëanshme(pa opozitën), negociatat për integrimin e Shqipërisë të shkojnë përpara. Vasili i bëri thirrje PD-së që shqetësimin e saj për rekomandimin 88 ta adresojë në BE.
“Nëse besojmë se kriza absurde e rekomandimit 88 nuk mund të mbajë peng reformën në drejtësi. Ne, LSI, shpreh kënaqësinë e saj, për mosrealizimin e reformës, të paktën dy muaj më parë, kur në tavolinat e kuvendit, ndodhej opinioni final i Komisionit të Venecias.
Vlerësoj se i duhet dhënë fund të gjithë konferencave të shtypit në distancë, që nuk i japin asnjë lloj zgjidhje reformës në drejtësi. Do të vlerësoja, që institucionet e larta të BE, të jepnin një gjykim për pozicionin dhe kërkesën e opozitës.
BE do duhet të na garantojë se megjithëse ne po bëjmë këtë hap të njëanshëm, ata duhet të na japin garanci se ky hap, do të çojë në hapin e rëndësishëm të hapjes së negociatave. Në të kundërt, nuk mund të merren përgjegjësi të tilla.. pasi do të krijonin një pasiguri të re në vend…
Ne si LSI jemi për mbajtjen e një referendumi për reformën në drejtësi, duke e parë si një instrument kushtetues për kalimin e reformës.”- tha Vasili.
Sipas Vasilit, pavarësisht kundërshtimeve, opozita ka pranuar tashmë se sistemi i drejtësisë është i kalbët dhe se duhet reformuar.
“Opozita është betuar publikisht se do ta votojë reformën, duke pranuar kështu të gjithë ndryshimin e thellë dhe rrënjësor të sistemit të drejtësisë. Por ajo është fokusuar tek pika 88, një këmbëngulje që është legjitime për pozicionin e saj.”-tha Vasili./ java/ a.k
