LSI vendoset në krah të PS-së për dërgimin e draftit të reformës në drejtësi në Kuvend dhe miratimin e tij brenda këtij sesioni, pavarësisht qëndrimit të PD-së. Petrit Vasili, kryetari grupit parlamentar të kësaj force në intervistën e tij për Report Tv thekson se objektivat që arrihen nga miratimi i reformës nuk mund të sakrifikohen për askënd.
“Reforma duhet të eci përpara në rrugën e miratimit të saj pasi është rruga e vetme dhe e duhur ku ne mundtë ecim për të mos penguar gjith ato objektiva madhorë që Shqipëria ka para vetes të cilat nuk mund të sakrifikohen për asnjë arsye… maxhoranca është e të njëjtit mendim, LSI ka qenë e qartë, të 20 votat e saj janë pro reformës”- tha Vasili.
Vasili nuk preferon të japë një koment për kërcënimin e PD-së se do të djegë mandatet nëse ndonjë nga deputetet e saj shitet dhe jep votën për reformën në drejtësi. Kërcënim që sipas tij përbën retorikë politike.
“Ne nuk interpretojmë as retorikën politike, pasi fjala djegie është një figuracion politik nuk është një gjuhë mirëfilli politike.. në kemi një objektiv politik dhe jo dy, që të kemi një reformë të miratuar brenda këtij sesioni… besoj që PD duhet të priret dhe të udhëhiqet nga e njëjta ndjeshmëri, për ta pasur këtë reformë të miratuar”- tha Vasili.
Për miratimin e paketës kushtetuese të reformës në drejtësi nevojiten 94 vota në parlament, pra dhe ato të opozitës. Kjo arsyeja që PD i trembet nga “tundimi” të ndonjërit të deputeteve të saj, “tundim” i cili shpresohet nga mazhoranca./ a.k
